මධ්‍යම පළාත් මාර්ග සංවර්ධන, ප්‍රවාහන, විදුලිබල හා බලශක්ති සහ නිවාස හා ඉදිකිරීම් අමාත්‍යංශයේ නිල වෙබ්අඩවිය වෙත පිවිසි ඔබ සියලුදෙනා සාදරයෙන් පිළිගනිමි. අප අමාත්‍යංශය වෙත පැවරී ඇති කාර්ය භාරය, එහි ප්‍රතිපත්තීන්, නවතම වැඩසටහන් ඇතුළු සමස්ත කටයුතු පිළිබඳව විශ්වාසවන්ත හා නිරවද්‍ය තොරතුරු ජනතාව හා අප අමාත්‍යංශය සමඟ සබඳතා පවත්වන සියළුම පාර්ශවකරුවන් වෙත කඩිනමින් හා පහසුවෙන් ළඟා කරදීම මෙම නිල වෙබ්අඩවියේ අරමුණයි.

මාර්ග සංවර්ධනය හා ප්‍රවාහන ක්ෂේත්‍රය නගාසිටුවීම තුළින් සුවපහසු හා ආරක්ෂිත ගමනක් දායක කිරීමත් බලශක්ති පරිභෝජනය ප්‍රශස්ත මට්ටමකට ගෙන ඒම හා නිවාස පහසුකම් සපුරාලමින් ජනජීවිතය ඉහළ නැංවීමත් මධ්‍යම පළාතේ ජනතාව වෙත උරුම කරදීම අප අමාත්‍යංශය මඟින් අපේක්ෂා කෙරේ.

එමෙන්ම ඉහත වගකීම් සපුරාලමින් මෙම නිල වෙබ්අඩවිය මඟින් ජනතාව වෙත මෙම අමාත්‍යංශගත නිවැරදි තොරතුරු කාර්යක්ෂමව හා වගකීම් සහිතව, පාරදෘශ්‍ය භාවයකින් යුක්තව ඉදිරිපත්කිරීමට බලාපොරොත්තු වේ.

මෙම නිල වෙබ්අඩවිය හරහා ජනතාව සමඟ පුළුල් සංවාදයක් ගොඩනැගීමත් අප අමාත්‍යංශයේ ප්‍රගතිය පිළිබඳ ක්ෂණිකව ජනතාව දැනුවත් කිරීමත් අපේක්ෂා කරමු.

මධ්‍යම පළාත් මාර්ග සංවර්ධන, ප්‍රවාහන, විදුලිබල හා බලශක්ති සහ නිවාස හා ඉදිකිරීම් අමාත්‍යංශය හා එහි කාර්ය මණ්ඩලය මහජනතාව වෙත වගකීමෙන් යුතුව, කැපවීමෙන් හා අවංකව කටයුතු කරමින් අප වෙත පැවරුණු කාර්ය භාරය නොපිරිහෙළා ඉටුකරමින් මධ්‍යම පළාත සාමාජීය හා ආර්ථික දියුණුවක් කරා ගෙනයාම තහවුරු කරනා බව සහතික කරමි.